Jol júrý qujatyn (bıletin) rásimdeý

1. Jol júrý qujatyn (bıletin) rásimdeý jolaýshynyń jeke basyn kýálandyratyn kelesi qujattyń bireýin kórsetken jaǵdaıda júzege asyrylady:
   • Qazaqstan Respýblıkasy azamatynyń tólqujaty;
   • Qazaqstan Respýblıkasy azamatynyń jeke kýáligi;
   • sheteldiktiń Qazaqstan Respýblıkasynda turýǵa yqtıarhaty;
   • azamattyǵy joq tulǵanyń kýáligi;
   • Qazaqstan Respýblıkasynyń dıplomatıalyq tólqujaty;
   • Qazaqstan Respýblıkasynyń qyzmettik tólqujaty;
   • Qazaqstan Respýblıkasy teńizshisiniń jeke kýáligi;
   • sheteldik tólqujat;
   • qaıtyp oralý týraly kýálik (basqa memleketterdiń azamattary úshin, eger olar Qazaqstan aýmaǵynda jeke basyn kýálandyratyn qujatty joǵaltsa, jol júrý baǵyty boıynsha otanyna oralýy úshin);
   • týý týraly kýálik (16 jasqa deıingi balalar úshin).

   Sondaı-aq myna qujattardy kórsetý kezinde jol júrý qujatyn (bıletti) rásimdeýge jol beriledi:

   • áskerı bılet – merzimdi qyzmettegi áskerı qyzmettiń áskerı qyzmetkerler úshin;
   • ýaqytsha jeke kýálik.

Jolaýshyny poıyzǵa otyrǵyzý

1. Jolaýshyny otyrǵyzý jol júrý qujatynda (bıletinde) kórsetilgen bekette jáne jol júrý qujatynda (bıletinde) kórsetilgen poıyzdyń júrý baǵytyndaǵy kez kelgen kelesi bekette júzege asyrylady.
2. Jolaýshy jolaýshylar poıyzyna otyrǵyzý kezinde jolserikke tıisti túrde rásimdelgen jol júrý qujatyn (bıletin) jáne jolaýshynyń jeke basyn kýálandyratyn qujattardyń biriniń túpnusqasyn usynady.
3. Bas áripterdi, sondaı-aq jolaýshynyń ákesiniń atynyń kórsetilý-kórsetilmeýin qospaǵanda, jol júrý qujatynda (bıletinde) onyń teginiń, atynyń, ákesiniń atynyń ekiden aspaıtyn árpi ózgeshelengen jaǵdaıda, ony poıyzǵa otyrǵyzýǵa jol beriledi.
   Joǵaryda kórsetilgen jaǵdaıdy qospaǵanda, jolaýshynyń tegi, ınısıaldary nemese aty, ákesiniń aty usynylatyn jol júrý qujatynda (bıletinde) kórsetilgen tulǵanyń tegine, ınısıaldaryna nemese atyna, ákesiniń atyna sáıkes kelmegen, jol júrý qujatynda (bıletinde) tulǵanyń tegi, ınısıaldary nemese aty, ákesiniń aty ózgertilgen (túzetilgen) jaǵdaıda, jolaýshy poıyzǵa otyrýǵa jiberilmeıdi.
   Mundaı jol júrý qujattary (bıletteri) boıynsha qaıta rásimdeý jáne aqshany qaıtarý júzege asyrylmaıdy.

Qol júgi men bagajdy alyp júrý

1. Jolaýshylardy poıyzǵa otyrǵyzý kezinde vagon jolserigi qol júginiń ólshemderi belgilengen normaǵa saı keletindigin tekseredi. Bir tolyq nemese balalardyń jol júrý qujaty (bıleti) úshin ózińmen salmaǵy 35 kılogramnan, úsh ólshemge shaqqandaǵy ólshemi 200 santımetrden (100х50х50) aspaıtyn qol júgin tegin alyp júrýge jol beriledi. Eger ózderiniń ólshemderi boıynsha qol júgin ornalastyrýǵa arnalǵan oryndarǵa syа́tyn bolsa, jolaýshylar poıyzdarynda qol júgin tasymaldaý úshin belgilengen norma esebinen bólshektelgen jáne qaptalǵan balalar arbalaryn, baıdarkalardy, motorsyz velosıpedterdi tasymaldaýǵa ruqsat etiledi.
   Jolaýshyǵa qol júginen bólek, úsh ólshemge shaqqandaǵy ólshemi 100 santımetrden kem shaǵyn zattardy, jınalmaly jáne (nemese) múgedekke arnalǵan arbalardy (eger mundaı arbany qoldanatyn bala nemese múgedek poıyzda ketip bara jatsa) jıylǵan kúıi tegin alyp júrýge jol beriledi.
   Múgedekterge jáne halyqtyń qozǵalysy shekteýli toptaryna jatatyn jolaýshylar ózderimen birge jeke paıdalanýǵa arnalǵan tehnıkalyq kómekshi (kompensatorlyq) quraldardy, arnaıy qozǵalý quraldaryn qosymsha túrde tegin alyp júre alady.
   Qol júgin tegin alyp júrýge qatysty basqa da talaptar Zańǵa sáıkes belgilenedi.
2. Jolaýshylar poıyzdarynda jol júrý kezinde jolaýshy qajettilik jaǵdaıynda, ózimen birge belgilengen normaǵa qosymsha kelesideı qol júgin alyp júredi:
   • bagaj tarıfi boıynsha jeke tólenetin aqy úshin salmaǵy 15 kılogramǵa deıingi júk, mundaıda jolaýshyǵa LÝ-12A formaly bagajdy tasymaldaý túbirtegi beriledi;
   • jatyn nemese kýpe vagonynyń bir kýpesinde tolyq qunyn tólep satyp alynǵan bir qosymsha jol júrý qujatyna (bıletine) shaqqanda salmaǵy 50 kılogramǵa deıingi júk;
   • tórt orynǵa arnalǵan jol júrý qujattarynyń (bıletteriniń) tolyq qunyn tóleý arqyly jeke kýpede ornalastyrylatyn jalpy salmaǵy 300 kılogramǵa deıingi júk.
   • Vagondy nemese basqa jolaýshylardyń zattaryn zaqymdaýy nemese lastaýy múmkin zattardy, sondaı-aq oqtalǵan qarýdy (memlekettik mańyzy bar jaǵdaılardy qospaǵanda), sasyq ıisti, órtený qaýpi bar, ýlaǵysh, ońaı tutanǵysh, jarylǵysh jáne basqa da qaýipti zattardy qol júgi túrinde tasymaldaýǵa jol berilmeıdi.
   • Qol júginiń joǵalýy, búlinýi tasymaldaýshynyń kinásinen oryn alǵan jaǵdaılardy qospaǵanda, qol júginiń joǵalý, búliný jáne saqtalmaý táýekeli jolaýshyǵa júkteledi.
   • Eger elektrondyq, turmystyq, beıne jáne aýdıotehnıkanyń úsh ólshemge shaqqandaǵy ólshemi 200 santımetrden, salmaǵy 35 kılogramnan aspasa, ol qol júgi normasy esebinde tasymaldanady.
   
   Kórsetilgen zattardy jol júrý qujaty (bıleti) esebinen, úsh ólshemge shaqqandaǵy ólshemi 100 santımetrden, bıiktigi bir metrden aspaıtyn qol júginiń belgilengen normasynan asatyn mólsherde tasymaldaýǵa jol beriledi.
   Normadan artyq mólsherde tasymaldanatyn qol júgi úshin kórsetilgen zatqa onyń salmaǵyna qaramastan, salmaǵy 30 kılogram bagajǵa qoldanylatyn tarıf boıynsha aqy tólenedi. Bul júk bagaj kasasynda «Qoldaǵy júk» túbirtegi boıynsha rásimdeledi. Eger kórsetilgen zatty tasymaldaý qosymsha satyp alynǵan jol júrý qujaty negizinde júzege asyrylsa, salmaǵy 30 kılogram bagaj tarıfi boıynsha qosymsha aqy alynbaıdy.
   Asa saqtyqty talap etetin teledıdarlar, radıoqabyldaǵyshtar, magnıtofondar men basqa da aspaptar vagondarda qol júgin tasymaldaý úshin bólingen oryndarǵa, jolaýshylar jol júrý qujattary boıynsha alatyn jerlerge ornalastyrylady. Ólshemderi boıynsha kýpeniń kiris esikterinen keń, iri ólshemdi teledıdarlar men basqa da aparattardy jolaýshylar vagondarynda tasymaldaýǵa jol berilmeıdi.

Jolaýshynyń qatynaý baǵytynda jol júrý sharttary

1. Ár jolaýshy jolaýshylar vagonynda jol júrý qujatynda (bıletinde) kórsetilgen orynǵa (oryndarǵa) sáıkes orynǵa (oryndarǵa) jaıǵasady. Bul oryndarǵa bógde tulǵalardyń jaıǵasýyna jol berilmeıdi.
2. Ár jolaýshy jol júrý qujatyn (bıletin) nemese otyrǵyzý talonyn búkil sapar barysynda saqtaıdy jáne ony baqylaý júrgizetin tulǵalardyń talaby boıynsha usynady (jol júrý qujaty (bıleti) eki qabatty slıpte, sondaı-aq JKM arqyly rásimdelgen jaǵdaılardy qospaǵanda jáne vagon jolseriginde saqtalady).
3. Jolaýshylar oryndardy táýliktiń kez kelgen ýaqytynda paıdalanady. Ústińgi sórelerdi kóterý jáne túsirý áreketin jolaýshylardyń ótinishi boıynsha vagondardyń jolserikteri nemese jolaýshylar oryndaıdy.
4. Poıyzdan qalyp qoıǵan jolaýshy bul týraly bekettiń (vokzaldyń) bastyǵyna nemese osyǵan ókiletti tulǵaǵa habarlaıdy.
   Eger poıyzdan qalyp qoıǵan jolaýshynyń vagonda qol júgi jáne (nemese) jol júrý qujaty (bıleti) bolsa, beket (vokzal) bastyǵy poıyzdyń qatynaý baǵytyndaǵy eń jaqyn bekettiń (vokzaldyń) bastyǵyna telefonogramamen qalyp qoıǵan qol júgin jáne (nemese) jol júrý qujatyn (bıletin) alý týraly dereý habarlaıdy.
   Kórsetilgen habarlamany alǵannan keıin bekettiń (vokzaldyń) bastyǵy poıyz bastyǵymen birlesip, qalyp qoıǵan jolaýshynyń qol júgin jáne (nemese) jol júrý qujatyn (bıletin) alýǵa jáne saqtaýǵa baǵyttalǵan sharalardy qabyldaıdy.
   Jolaýshylar poıyzynyń bastyǵy qol júgi men (nemese) jol júrý qujatynyń (bıletiniń) ataýyn jáne qaldyrylǵan oryndar sanyn kórsetý arqyly akt jasaıdy. Aktige poıyz bastyǵy, vagon jolserigi jáne qalyp qoıǵan jolaýshy kele jatqan vagondaǵy eki jolaýshy qol qoıady.
   Qol júgi, jeke zattar men (nemese) jol júrý qujaty (bıleti) aktimen birge beketke (vokzalǵa) tapsyrylady. Beket (vokzal) bastyǵy jolaýshy ornalasqan beketke tıisti poıyzdan jolaýshynyń qol júginiń, jeke zattar men (nemese) jol júrý qujatynyń (bıletiniń) alynǵany týraly habarlaıdy.
5. Poıyz júrgennen keıin jolaýshynyń jol júrý qujaty (bıleti) ony shyǵaryp salýshyda qalyp qoıǵan jaǵdaıda, jolaýshy bıletsiz dep esepteledi.
   Qatynaý jolynda jolserik baqylaý kýponyn alǵannan keıin jolaýshy jol júrý qujatyn (bıletin) joǵaltyp alǵan nemese jol júrý qujattaryn (bıletterin) búldirip alǵan (jyrtylý, órtený) jaǵdaıda, jol júrý qujattary (bıletteri) qalpyna keltirilmeıdi. Mundaıda jolaýshy qajettilik jaǵdaıynda, jolseriktiń qolyndaǵy baqylaý kýpony negizinde sapardy jalǵastyrady.
6. Jolaýshylar poıyzynyń vagonynda júrý kezinde mynalarǵa jol berilmeıdi:
   • jol júrý qujattarynsyz (bıletterinsiz) jol júrý;
   • vagondardyń satylarynda, tóbelerinde jáne vagonnyń astynda jol júrý, poıyz júrip kele jatqanda oǵan otyrý jáne odan túsý;
   • vagondy nemese basqa jolaýshylardyń zattaryn zaqymdaýy nemese lastaýy múmkin qol júgin, sondaı-aq sasyq ıisti, órtený qaýpi bar, ýlaǵysh, ońaı tutanǵysh, jarylǵysh jáne basqa da qaýipti zattardy alyp júrý;
   • qajet bolmaǵan jaǵdaıda, poıyzdy stop-krannyń kómegimen toqtatý;
   • poıyz júrip kele jatqan kezde tambýrlarda jáne ótpeli alańdarda turý;
   • belgilenbegen jerlerde temeki shegý;
   • vagondardyń terezeleri men esikterinen qoqys pen basqa zattardy laqtyrý.
7. Almaly-salmaly qural-jabdyqtardyń, jumsaq almaly-salmaly qural-jabdyqtardyń (tósek-oryn jabdyqtarynyń jıyntyqtary men tysyn qosa alǵanda), almaly-salmaly jabdyqtardyń, ydys-aıaqtyń, sondaı-aq vagonnyń ishki jabdyqtarynyń ishinara, tolyq zaqymdaný nemese joǵalý qunyn óteý jaýapkershiligi olardyń tasymaldaýshy belgileıtin qunyna sáıkes kináli tulǵaǵa júkteledi.

Jol júrý sharttarynyń ózgerýi

1. Qatynaý jolynda nemese qurý jáne aınalý pýnktinde tehnıkalyq aqaýlyǵy sebebinen vagondy (poıyzdy) aýystyrý jáne (nemese) tirkemeden ajyratý jaǵdaıynda, tasymaldaýshy jolaýshylardy basqa poıyzǵa aýystyrý nemese sol poıyzdaǵy bos oryndarǵa, sonyń ishinde sanaty joǵarylaý vagondardaǵy oryndarǵa jaıǵastyrý sharalaryn qabyldaıdy.
   Sanaty joǵarylaý vagonǵa (poıyzǵa) aýystyrý kezinde balalary bar jolaýshylarǵa, naýqastarǵa, egde jastaǵy adamdarǵa, múgedekterge jáne Uly Otan soǵysyna qatysýshylar men olarǵa teńestirilgen adamdarǵa basymdyq beriledi. Sanaty joǵarylaý vagonǵa (poıyzǵa) aýystyrý kezinde jolaýshylardan qosymsha aqy alynbaıdy, al jolaýshynyń kelisimimen sanaty tómendeý vagonǵa (poıyzǵa) aýystyrý kezinde jol júrý qunynyń aıyrmasy tólenedi.
   Tap sol poıyzǵa jaıǵastyrylmaǵan jolaýshylar júrý ýaqyty eń jaqyn poıyzben buǵan deıin satyp alynǵan jol júrý qujattary (bıletteri) boıynsha jóneltiledi.
   Tasymaldaýshynyń kinásinen jolaýshylardy basqa vagonǵa (poıyzǵa) májbúrlep aýystyrý (aýdarý) áreketi ár jaǵdaıda poıyz bastyǵy tarapynan jasalatyn jáne onyń qoly qoıylatyn aktimen rásimdeledi, sondaı-aq oǵan jolaýshy jáne mundaı aýystyrý (aýdarý) júzege asyrylǵan vokzaldyń jumyskeri qol qoıady, jáne vokzaldyń (bekettiń) mórqalybymen kýálandyrylady. Aktiniń birinshi danasy jolaýshyǵa beriledi, al aktiniń ekinshi danasy poıyz reısi aıaqtalǵannan keıin quramdy qurýshy jolserikterdiń rezervine tapsyrylady. Tap sol poıyzǵa aýystyrylmaǵan nemese jaıǵastyrylmaǵan jolaýshyǵa júrilmegen qashyqtyq úshin akt negizinde bılet kasasynda jol júrý quny tolyǵymen qaıtarylady.
   Jol júrý sharttary ózgergen barlyq jaǵdaılarda, sondaı-aq poıyzdyń 1 saǵattan artyq kidirýi jáne keshigýi jaǵdaıynda, vagon jolserigi jol júrý qujatynyń (bıletiniń) keri jaǵyna belgi qoıady.
2. Jolaýshylardy tirkemeden ajyratylǵan vagonnan basqa vagondarǵa aýystyrý kezinde poıyz bastyǵy vokzal bastyǵymen (jumyskerimen) birlesip, saqtyq sharalaryn qabyldaý jáne jolaýshylardyń qaýipsizdigin qamtamasyz etý arqyly jolaýshylardyń qol júgin tasymaldaýǵa kómek kórsetý sharalaryn uıymdastyrady.

Tasymaldaýdan bas tartý jáne tasymaldaý shartyn buzý

1. Jolaýshy aınalasyndaǵylardyń tynyshtyǵyn buzatyndaı naýqas kúıde bolǵan jáne mundaıda ony jeke ornalastyrý múmkin bolmaǵan jaǵdaıda, tasymaldaýshy jolaýshyny odan ári tasymaldaýdan bas tarta jáne poıyzdan túsire alady.
   Bul jaǵdaıda tasymaldaýshy jolaýshyny poıyzdan dárigerlik-medısınalyq qyzmetkerlerdiń qatysýymen jáne tek emdeý-medısınalyq uıymy bar bekette ǵana túsiredi. Mundaıda jolaýshyǵa júrilmegen qashyqtyq úshin tólemdi qaıtarý tártibi negizinde tıisti tólemder qaıtarylady nemese belgi qoıylady. Jolserik jolaýshyǵa baqylaý kýponyn qaıtarady. Bul rette, poıyz bastyǵy vagon jolseriginiń jáne emdeý-medısınalyq uıym jumyskeriniń qatysýymen 2 danada akt jasaıdy.
   Eger poıyzdan túsirý kezinde jolaýshy onyń bagajynyń mejeli beketke deıin barýyn qalamasa, bagaj túbirtekti usynǵan jaǵdaıda jolaýshy poıyzdan túsirilgen bekette beriledi nemese bagajdy túsirý múmkin bolmaǵan jaǵdaıda, ol eń jaqyn beketke deıin tasymaldanady. Jolaýshy bagajdy tasymaldaý qunyn tólegen jaǵdaıda, bagaj keri baǵyttaǵy birinshi poıyzben jolaýshy poıyzdan túsirilgen beketke qaıtarylady. Jolaýshy aýrýyna baılanysty poıyzdan túsirilgen jaǵdaıda, jolaýshynyń bagajy jolaýshy poıyzdan túsirilgen beket (vokzal) bastyǵynyń jedelhaty nemese telefonogramasy negizinde tegin qaıtarylady.
2. Eger jolaýshy poıyzǵa otyrý kezinde nemese jol júrý barysynda qoǵamdyq tártipti buzsa jáne basqa jolaýshylardyń tynyshtyǵyna kedergi keltirse, tasymaldaýshy jolaýshyny tasymaldaýdan bas tarta alady.
   Bul jaǵdaıda quqyq qorǵaý organdarynyń jumyskerleri poıyz bastyǵy men vagon jolseriginiń qatysýymen jolaýshyny tirek pýnkti jumys isteıtin eń jaqyn tarıftik bekette poıyzdan túsiredi, bul týraly qol júginiń bar-joǵyn kórsetý arqyly 3 danada akt jasalady. Jolaýshyǵa jol júrý jáne bagajdy tasymaldaý aqysy qaıtarylmaıdy.